مندرجہ ذیل مولوی عبدالعزیز کی گرفتاری کی ڈرامہ وڈیو ہے جس میں مولوی عبدالعزیز کو کالا برقعہ پہنا کر اس کا پی ٹی وی پر انٹرویو کے نام سے الزامات شو دکھایا گیا

[youtube=http://www.youtube.com/watch?v=G31wKUb9-Hc]

اصل وڈیو

[youtube=http://www.youtube.com/watch?v=UdGt4i7zvts]

مندرجہ ذیل مولوی عبدالعزیز کی گرفتاری کی اصل وڈیو ہے جس میں مولوی عبدلعزیز نے کالا برقعہ نہیں پہنا ہوا بلکہ سفید کرتا پہنا ہوا ہے ۔ ایک اور بات یہ ہے کہ حکومتی اعلان کے مطابق مولوی عبدالعزیز کو وومن پولیس نے پکڑا تھا جبکہ اصل صورتِ حال مختلف ہے ۔ اس وڈیو سے یہ بھی ظاہر ہوتا ہے کہ مولوی عبدالعزیز کو اس وقت احساس نہیں تھا کہ اُسے گرفتار کیا جا رہا ہے ۔ اس سے مولوی عبدالرشید غازی اور وفاق المدارس کی مذاکراتی ٹیم کے ایک رکن کا استدلال صحیح ثابت ہوتا ہے کہ مولوی عبدالعزیز کو مذاکرات کے بہانے باہر بُلا کر گرفتار کر لیا گیا ۔

مولوی عبدالعزیز کی گرفتاری کی دونو وڈیوز حکومتِ پاکستان نے ریلیز کیں تھیں

لال مسجد جامعہ حفصہ کمپلیکس میں شہید ہونے والوں کو فوجی حکام نے بدھ 11 جولائی اور جمعرات 12 جولائی کی درمیانی رات بڑے بڑے گڑھے کھود کر اجتماعی طور پر دفنانا شروع کر دیا تھا ۔ نہ میّتوں کی پہچان کرائی گئی اور نہ اپنے بچوں ۔ بچیوں ۔ بہنوں ۔ بھائیوں کیلئے اسلام آباد میں آپریشن ایریا کے قریب پہنچے ہوئے سینکڑوں خواتین و حضرات کو مطلع کیا گیا ۔ وہ بیچارے اِدھر سے اُدھر پریشان حال پھرتے رہے ۔ اس سے قبل لاشیں نکال کر چوری چھُپے اسلام آباد ۔ راولپنڈی ۔ ٹیکسلا سمیت مختلف مقامات پر کولڈ سٹورز میں پہنچائی گئیں تھیں اور ان کے گرد سخت حفاظتی پہرے لگا دیئے گئے تھے ۔

جب آپریشن شروع ہوا اس وقت لال مسجد جامعہ حفصہ کمپلیکس میں 2500 کے لگ بھگ افراد تھے جن میں بھاری اکثریت طالبات کی تھی ۔ زخمیوں کو ملا کر باہر نکل آنے والوں کی حکومت کی طرف سے دی گئی زیادہ سے زیادہ تعداد 1300 سے کم ہے ۔ سوال یہ پیدا ہوتا ہے کہ باقی 1200 سے زائد افراد کہاں گئے جن میں بہت سی طالبات بھی شامل تھیں ؟

جیسا کہ میں پہلے لکھ چکا ہوں 10 جولائی کو ایدھی صاحب سے 200 کفن مانگے گئے پھر 11 جولائی کی صبح 800 یا 1000 مزید کفن مانگے گئے لیکن یہ خبر نجی ٹی وی چینلز پر نشر ہونے کے بعد ایدھی صاحب کو مزید کفن بھیجنے سے منع کر دیا گیا ۔ بعد میں ایدھی صاحب نے بتایا کہ ان سے 1200 کفنوں کا مطالبہ کیا گیا تھا ۔ اس سے بھی ثابت ہوتا ہے کہ لال مسجد جامعہ حفصہ کمپلیکس میں شہید ہونے والوں کی تعداد 1200 کے لگ بھگ ہے ۔

انتظامیہ کا کہنا تھا کہ ایک تابوت میں صرف ایک لاش ہے ۔ اسلام آباد کے ایچ ۔ 11 قبرستان میں 12 جولائی کی صبح تدفین کے دوران جب کچھ صحافی پہنچے تو ایک تابوت کے اندر کئی لاشیں پائی گئیں ۔ اس کے بعد صحافیوں کو وہاں سے ہٹا دیا گیا ۔ صحافیوں کے پہنچنے سے پہلے بہت کچھ زیرِ زمین دبایا جا چکا تھا ۔ بعد میں قبرستان میں مزید قبروں کی کھدائی کے لئے مزید مزدوروں کو بھی بلا یا گیا تھا

مولوی عبدالعزیز اور مولوی عبدالرشید غازی کی والدہ کی میّت گم ہو گئی ۔ اگر مرنے والوں میں بے شمار عورتیں نہ ہوتیں تو ایک عورت کی میّت کیسے گم ہو تی ؟

ایک شخص 11 جولائی کی صبح سرکاری طور پر لال مسجد جامعہ حفصہ کمپلیکس کے اندر گیا تھا ۔ اُس نے بتایا کہ ہر طرف سفید چادروں میں لپٹی لاشیں ہی لاشیں پڑی تھیں جو سینکڑوں تھیں اور ان میں سے جلے گوشت کی بُو آ رہی تھی ۔ اس نے لال مسجد کی چھت پر بھی کچھ لاشیں دیکھیں جن کو پرندوں نے نوچا ہوا تھا ۔ اس نے بتایا کہ جامعہ حفصہ کی عمارت کو بہت زیادہ نقصان پہنچا تھا اور لال مسجد کی حالت بہتر تھی ۔ لال مسجد جامعہ حفصہ کمپلیکس کی چاردیواری کئی جگہوں سے گر چکی تھی ۔ لال مسجد کی عمارت میں کمانڈوز نے بارود سے اُڑا کر جو سوراخ بنائے تھے ان سے پوری مسجد کے اندر دیکھا جا سکتا ہے ۔

حکومت کے اہلکار لال مسجد جامعہ حفصہ کمپلیکس میں شہید ہونے والوں کی تعداد کبھی 73 بتاتے اور کبھی 150 سے 250 تک ۔ حکومت نے مرنے والوں کی جو فہرست لگائی اس میں ورثاء کی اکثریت کو اپنے بچوں یا بچیوں کے نام نہیں ملے ۔ اس جھوٹ کی صرف ایک ہی وجہ ہو سکتی ہے کہ 150 یا 250 کے علاوہ باقی مرنے والی طالبات اور معلمات تھیں ۔ چونکہ حکومت کے سینیئر فوجی اور سویلین اہلکاروں نے بار بار اعلان کیا تھا کہ کوئی طالبہ یا عورت ہلاک نہیں ہوئی اور اس بڑے جھوٹ کو چھپانے کا ایک ہی طریقہ تھا کہ ان کی لاشیں غائب کر دی جائیں ۔

میڈیا کے لوگوں کو 11 جولائی کو 11 بجے قبل دوپہر لال مسجد جامعہ حفصہ کمپلیکس لیجانے کا کہا گیا مگر لیجایا نہ گیا ۔ پھر 12 جولائی بعد دوپہر میڈیا کے کچھ افراد کو لے جایا گیا مگر لیجانے سے پہلے لال مسجد اور جامعہ حفصہ کی صفائی کی گئی ۔ لال مسجد کی عمارت کی کئی جگہوں کی تازہ مرمت کی گئی اور تازہ رنگ کیا گیا تھا ۔ جامعہ حفصہ کے سب کمرے جلے ہوئے تھے اور چھت کے پنکھوں کے پر  پگھل کر لٹک گئے تھے ۔ ایسے میں وہاں موجود طالبات کا کیا بچا ہو گا ؟  صحافیوں کو وضو کرنے کی جگہ ۔ تالاب اور کئی دوسری جگہوں کی طرف جانے نہیں دیا گیا ۔ اس کا مقصد سوائے اسکے کیا ہو سکتا ہے کہ میڈیا والے اندر کی اصل صورتِ حال نہ جان سکیں ۔

آپریشن سے پہلے ایک خاص قسم کا بغیر پائلٹ کے جہاز لال مسجد جامعہ حفصہ کمپلیکس کے اوپر سے گذرا تھا ۔ ایسے جہاز امریکہ کے پاس ہیں ۔ ان سے عمارت کے اندر موجود انسانوں کی تصاویر لی جا سکتی ہیں ۔ اس کے بعد جامعہ حفصہ کے اندر ایسے گولے پھینکے گئے جن سے اتنی زیادہ حرارت پیدا ہوتی ہے کہ انسانی جسم بھسم ہو جاتے ہیں ۔ ایسے گولے امریکہ نے بغداد ایئرپورٹ پر پھینکے تھے اور 2500 ریپبلیکن گارڈز بھسم ہو گئے تھے اور ان کے جسموں کا بہت کم مادہ بچا تھا جو آسانی سے وہاں سے ہٹا دیا گیا تھا ۔

اس سے واضح ہو جاتا ہے کہ صحافیوں کا دورہ کیوں 27 گھنٹے مؤخر کیا گیا اور رات کی تاریکی میں چوری چھپے کیوں اجتمائی تدفین کی گئی ۔ امریکہ تو غیروں بالخصوص مسلمانوں کو مارتا ہے لیکن ہمارے اپنے آپ کو سیّد کہنے والے صیہونی نے اپنے ہی ملک کی سینکڑوں مؤمنہ بچیوں اور مؤمن بچوں کو بھسم کر دیا ۔ اور اس پر دہشتگرد بُش کی داد وصول کی ۔

میڈیا والوں کو اسلحہ اور ایمونیشن کے ڈھیر دکھائے گئے ۔ یہاں پر بھی حکومتی منصوبہ بندی مات کھا گئی ۔ ایمونیشن کا اتنا بڑا انبار ہوتے ہوئے جنگجو جو 100 سے زائد کہے جاتے تھے اور ان کے پاس مشین گنیں تھیں تو وہ کیسے ڈھیر ہو گئے ؟ ایک ریٹائرڈ آفیسر کہتے ہیں کہ ان کے پاس اتنا اسلحہ ۔ ایمونیشن اور صرف 50 جوان ہوتے تو وہ کم از کم ایک ماہ تک کسی حملہ آور کو لال مسجد جامعہ حفصہ کمپلیکس کے قریب بھی نہ آنے دیتے ۔ ویسے تو کون نہیں جانتا کہ ہمارے ملک میں جب پولیس والے یا سیکیورٹی ایجنسی والے کسی کو گرفتار کرتے ہیں تو اس سے ہر قسم کی چیز برآمد کر لیتے ہیں ۔ مولوی عبدالرشید غازی نے تو کہا تھا کہ ہمارے مرنے کے بعد حکومت یہاں سے ایٹم بم بھی برآمد کر سکتی ہے ۔

صحافی کیا بتاتے رہے ؟

مسجد کے شمال مشرق میں کورڈ مارکیٹ کے قریب مدرسے سے رضاکارانہ طور پر نکلنے والوں کے لیے قائم ’سرینڈر پوائنٹ‘ پر صحافیوں کی سہولت کے لیے کیمپ لگا دیا جوکہ درحقیقت سہولت کم اور ’سرینڈر‘ زیادہ تھا۔

صحافیوں کو وہاں تک محدود کر دیا گیا۔ انہیں بہترین کھانے اور ٹیلیفون کی سہولت کے علاوہ جب حکومت کا دل چاہا اور جتنی چاہی معلومات بھی فراہم کر دیں۔ یعنی صحافیوں کی انگریزی میں جو کہتے ہیں ’سپون فیڈنگ‘ کی گئی۔
حکومت نے تو جو کیا سو کیا صحافی بھی اس صورتحال میں کافی خوش اور مطمئن دکھائی دیئے۔ اسلام آباد کے صحافی میرے خیال میں ملک کے دیگر علاقوں کے صحافیوں سے زیادہ تعلیم یافتہ اور دانشمند ہیں لیکن اس ’سپون فیڈنگ‘ پر کسی نے کوئی اعتراض نہ کیا۔

ذریعہ آج اور جیو ٹی وی چینلز ۔ جنگ ۔ ڈان ۔ دی نیوز ۔ ڈان ۔ بی بی سی اُردو

مولوی عبد العزیز نے گرفتار ہونے کے بعد کہا تھا کہ لال مسجد جامعہ حفصہ کمپلیکس کے اندر ان لوگوں کے پاس 14 بندوقیں یا کلاشنکوفیں [Klashinkov] ہیں اور مولوی عبدالرشید غازی مرحوم نے بھی کئی بار یہی کہا تھا ۔ جبکہ حکومت کا دعوٰی تھا جو کہ بار بار دہرایا جاتا رہا کہ لال مسجد جامعہ حفصہ کمپلیکس کے اندر جنگجو [Militants] مسلح ہیں اور ان کے پاس راکٹ لانچرز [Rocket Launchers] اور دوسرا بڑا اسلحہ [Heavy Weapons like Mortar] بھی ہے ۔ وہاں خود کُش بمبار [Suicide Bombers] موجود ہیں اور بارودی سرنگیں [Land Mines] بچھائی گئی ہیں ۔ اور یہ کہ انہوں نے انسانی ڈھال کے طور پر استعمال کرنے کیلئے عورتوں اور بچوں کو یر غمال بنا رکھا ہے ۔ مزید یہ کہغیرملکی دہشتگرد اندر چھپے ہوئے ہیں ۔

حکومت کے سارے دعوے اس وقت جھوٹے اور فریب ثابت ہوئے جب فرض شناس فوجی افسران [جنرل یا بریگیڈیئر نہیں] لال مسجد جامعہ حفصہ کمپلیکس میں داخل ہوئے ۔ انہیں نہ تو بندوقوں یا کلاشنکوفوں کے سوا کوئی اور اسلحہ ملا ۔ نہ انہوں نے کوئی بارودی سرنگ دیکھی اور نہ ہی انہوں نے کوئی طالبہ یرغمال بنی ہوئی دیکھی ۔ اور نہ ہی حکومت غیرملکی دہشتگردوں کی موجودگی ثابت کر سکی ۔

اب واضح ہو گیا ہے کہ میڈیا کو آپریشن ایریا [Operation Area] سے اتنا دور اسلئے رکھا گیا تھا کہ حکومت کے حکم پر کئے گئے ناحق قتلِ عام کا کسی کو علم نہ ہو جائے ۔ خیال رہے کہ آپریشن کے پہلے ہی دن ایک صحافی جو آپریشن ایریا کے قریب آیا تھا رینجرز کی گولی سے ہلاک ہو گیا تھا ۔ اسی لئے کسی اور صحافی نے پھر قریب جانے کی جرأت نہ کی اور زیادہ تر حکومت کی مہیّا کردہ اطلاعات ہی نشر کرتے رہے ۔

مولوی عبدالرشید غازی مرحوم کی جانب سے بار بار کی ان درخواستوں کے باوجود کہ میڈیا کو کمپلیکس کے اندر آنے کی اجازت دیجائے تاکہ وہ صورتحال کو خود اپنی نگاہوں سے دیکھ سکے ۔ حکام نے نہ صرف میڈیا کو اندر جانے کی اجازت نہ دی بلکہ ارکان پارلیمنٹ ۔ علماء اور چوہدری شجاعت حسین سمیت حکومتی نمائندوں کو بھی کمپلیکس کے اندر جانے کی اجازت نہ دی ۔

حکا م کے دعوے کے مطابق منگل کو 27 خواتین آزاد کرائی گئی تھیں ۔ ان میں سے کسی نے اپنے یر غمالی بنائے جانے کی تصدیق نہیں کی ۔ بجائے اس کے یہ خواتین حکام سے درخواست کرتی رہیں کہ انہیں جامعہ حفصہ میں واپس جانے دیا جائے تاکہ وہ شہادت حاصل کر سکیں اور جب انہوں نے مولوی عبدا لرشید غازی کی شہادت کی خبر سنی تو پھوٹ پھوٹ کر رونے لگیں ۔

جامعہ حفصہ کی کئی طالبات کے والدین نے رابطہ پر بتایا تھا کہ ان کی بار بار کی درخواستوں کے باوجود طالبات اپنے گھروں کو واپس جانے کیلئے تیار نہیں ہیں ۔

ذریعہ آج اور جیو ٹی وی چینلز ۔ جنگ ۔ دی نیوز

کل یعنی 10 جولائی 2007

قبل دوپہر اعلان کیا گیا تھا کہ مولوی عبدالرشید غازی ایک تہہ خان میں چھُپے ہوئے ہیں ۔

بعد دوپہر کئی زبردست دھماکے ہوئے ۔

بعد دوپہر بتایا گیا کہ انہوں نے اپنے آپ کو حوالے نہ کیا اور گولیوں کے تبادلہ میں ہلاک ہو گئے ۔ ان کی لاش آپریشن کے مکمل طور پر ختم ہو جانے کے بعد نکالی جائے گی ۔

فوجی حکمرانوں کی طرف سے بار بار یہ اعلان کیا جاتا رہا کہ کوئی طالبہ آپریش میں ہلاک نہیں ہوئی ۔

دوپہر تک آپریشن سائلنس کا وہ حصہ مکمل ہو گیا تھا جس میں لال مسجد اور جامعہ حفصہ پر قبضہ کرنا اور وہاں موجود لوگوں کو ہلاک یا قید کرنا شامل تھا جس کے بعد متعلقہ علاقہ میں مکمل خاموشی چھا گئی تھی اور بہت ساری ایمبولنسز اور بسیں منگوائی گئی تھیں ۔

فوجی حکام نے ایدھی سے 200 کفن مانگے جو اس نے بھجوا دئیے ۔

شام تک یہ خبر پھیل گئی کہ لاشیں دھڑادھڑ گاڑیوں میں بھر کر کہیں بھیجی جا رہی ہیں ۔

آج یعنی 11 جولائی

صبح 800 مزید کفن ایدھی سے مانگے جانے کی خبر نشر کی گئی مگر ٹی وی پر یہ خبر نشر ہونے کے کچھ دیر بعد کہہ دیا گیا کہ مزید 800 کفن نہیں چاہئیں ۔

پھر خبر نشر ہوئی کہ ایدھی کی ایمبولنسز کو علاقہ سے نکل جانے کا حکم دے دیا گیا ہے ۔

دوپہر کو بتایا گیا کہ مولوی عبدالرشید کی لاش کا ہسپتال میں پوسٹ مارٹم کیا جا رہا ہے ۔

بعد دوپہر ایک بجے کے قریب اعلان کیا گیا کہ مولوی عبدالرشید کی لاش ڈیرہ غازی خان میں اسکے آبائی گاؤں روجھان روانہ کر دی گئی ہے اور اسکی والدہ کو جامعہ فریدیہ کے پاس دفن کیا جا رہا ہے ۔

بعد دوپہر سوا دو بجے اعلان ہوا کہ مولوی عبدالرشید کی لاش اس وقت تک نہیں بھیجی جائے گی جب تک اسکی والدہ کی لاش نہیں مل جاتی ۔

گذشتہ رات یعنی 10 اور 11 جولائی کی درمیانی رات لال مسجد سے کئی زوردار دھماکوں کی آوازیں سنی گئیں ۔ پھر 11 جولائی کو قبل دوپہر بھی زوردار دھماکے سنے گئے ۔

دوپہر 12 بجے کے قریب اعلان کیا گیا کہ آپریشن مکمل ہو گیا ہے اور بعد دوپہر ایک بجے صحافیوں کو لال مسجد اور جامعہ حفصہ کا دورہ کرایا جائے گا ۔ مگر ایسا ابھی ہوا نہیں جبکہ بعد دوپہر کے 3 بج چکے ہیں ۔

بعد دوپہر اعلان کیا گیا کہ آپریش میں مرنے والوں کی تعداد 150 سے 250 تک ہے لیکن اصل تعدار آپریشن مکمل ہونے کے بعد معلوم ہو گی ۔

فوجی حکام کی طرف سے پھر کہا جا رہا ہے کہ آپریشن ابھی ختم نہیں ہوا ۔

قیافے

ایدھی سے مانگے ہوئے مزید 800 کفنوں سے اسلئے انکار کر دیا گیا کہ مرنے والوں کی اصل تعداد عوام کو معلوم ہو گئی تو کہرام مچ جائے گا ۔

بقول فوجی حکام مولوی عبدارشید ایک تہہ خانے میں تھا اور سخت مقابلہ ہو رہا تھا ۔ پھر زوردار دھماکے ہوئے ۔پھر ان کی میت کو بھیجنے کے متعلق متضاد بیانات ۔ کیا یہ نہیں کہا جا سکتا کہ جس کمرے میں مولوی عبدالرشید تھے اسے دھماکے سے اُڑادیا گیا جس کے نتیجہ میں مولوی عبدالرشید اور اس کے خاندان کے دوسرے لوگ جاں بحق ہو گئے ؟ اور چونکہ مولوی عبدالرشید اور اس کے ساتھ ہلاک ہونے والوں کی لاشیں یا ان کے چہرے دھماکے کی وجہ سے مسخ ہو گئے ہیں اسلئے تاخیر کی اصل وجہ یہ ہے کہ وارثوں کے حوالے کیا جائے یا پھر اسے بھی اکبر بگٹی کی طرح دفن کر دیا جائے ۔ مولوی عبدالرشید کی لاش کا پوسٹ مارٹم کیا جا رہا تھا یا جراحی کے ذریعہ ان کی شکل بنانے کی کوشش کی جا رہی تھی جیسا کہ صدام حسین کے بیٹوں کے ساتھ امریکیوں نے کیا تھا ؟

آج جو دھماکے ہوئے ان کا مقصد شیطانی ہو سکتا ہے ۔ مثال کے طور پر خفیہ کھوہ بنا کر اس میں اسلحہ یا بارود کا انبار لگا کر بعد میں صحافیوں کو دکھا دیا جائے کہ دیکھو لال مسجد کے جنگجوؤں کا ذخیرہ ۔ یا غار نما بنا کر دکھایا جائے کہ یہ دیکھو جنگجوؤں نے لڑائی کی لمبی منصوبہ بندی کی ہوئی تھی ۔ وغیرہ

صحافیوں کو بعد دوپہر ایک بجے کے دورہ کا کہہ کر اسے مؤخر کر دینا بھی شیطانی ہو سکتا ہے جس میں مولوی عبدالعزیز اور مولوی عبدالرشید کے خاندان کو مزید کسی طریقہ سے بدنام کرنے کی منصوبہ بندی شامل ہو سکتی ہے ۔

کیا آپ جانتے ہیں کہ حکومتی کارندوں نے مولوی عبدالعزیز کو مذاکرات کے بہانے باہر بُلایا اور باہر آنے پر اُسے گرفتار کر لیا گیا ۔ بعد میں زبردستی اسے کالا برقعہ پہنایا دیا گیا ؟

ریٹائرڈ لیفٹنٹ جنرل راحت لطیف نے کہا کہ جذباتیت کی ابتداء لال مسجد والوں نے کی اور انتہا حکومت نے کر دی۔انہوں نے کہا کہ حکومت چند لوگوں کو معافی دیکر اس خوں خرابے سے بچ سکتی تھی لیکن ایسا نہیں کیا گیا۔ انہوں نے ہندوستان کی مثال دیتے ہوئے کہا کہ انہوں نے اپنے تین سو مسافروں کی جان بچانے کے لیے مولانا مسعود اظہر اور ان کے ساتھیوں کو رہا کر دیا تھا حالانکہ وہ لوگ ہندوستان کی نظر میں بہت بڑے مجرم تھے۔ انہوں نے کہا کہ اس کے مقابلے میں پاکستان نے اپنے لوگوں کی جانیں بچانے کے لیے اپنے ہی ملک کے لوگوں کو معاف کرنا مناسب نہیں سمجھا۔

متحدہ مجلس عمل کے صدر قاضی حسین احمد نے لال مسجد آپریشن کو قتلِ عام اور ایک سانحہ قرار دیا اور کہا کہ پوری فوج کو ضمیر کا مجرم بنا دیا گیا ہے۔ ایک بیان میں انہوں نے کہا کہ متعدد گواہیاں آ گئی ہیں کہ ’مذاکرات ایوان صدر نے ناکام بنائے اور مسجد اور خواتین کا تقدس خاک میں ملا دیا گیا‘۔انہوں نے الزام لگایا کہ مذاکرات کے عین دوران حکومتی مذاکراتی ٹیم کی موجودگی میں حملے کا آغاز کر دیا گیا تھا۔ انہوں نے کہا کہ لال مسجد میں قتل عام کر کے قوم اور فوج کے درمیان ایک خونی لکیر کھینچ دی گئی ہے اور جنرل مشرف کی سربراہی نے پوری قوم کو فوج کے روبرو لا کر کھڑا کر دیا ہے۔

جمعیت علمائے اسلام (س) کے سربراہ مولانا سمیع الحق نے کہا کہ جب مذاکرات کامیاب ہوچکے تھے عین اس وقت نادیدہ قوت نےاپنا کام دکھایا اور نتیجے کے طور پر اسلام آباد کو خون میں نہلا دیا گیا۔ ان کا کہنا تھا کہ صدر مشرف پاکستان میں امریکی رٹ قائم کرنے میں لگے ہوئے ہیں اور اسے خوش کرنے کے لیے ملک کے مستقبل سے کھیلا جا رہا ہے۔انہوں نے صدر مشرف کو مشورہ دیا کہ وہ امریکی رٹ قائم کرنےکی بجائے اللہ کی رٹ قائم کرنے کی کوشش کریں۔ مولانا سمیع الحق نے کہا کہ لال مسجد کے واقعہ کے بعد ملک کے انتشار میں اضافہ ہوگا۔

جماعت الدعوۃ کے امیر حافظ محمد سعید نے کہا کہ مسلم لیگ( ق) کے سربراہ شجاعت حسین، علماء کمیٹی اور لال مسجد انتظامیہ کے درمیان ہونے والے معاہدے کو ایک سازش کےتحت سبوتاژ کر کے پورے اسلام آباد کو خاک و خوں میں نہلا دیا گیا۔ انہوں نے کہا کہ ملک میں عدم استحکام بڑھے گا۔

میں مندرجہ ذیل دعا مانگتا ہوں اور دیکھتا ہوں کتنے قارئین ہیں جو اس پر آمین لکھتے ہیں ۔

اے خالق و مالکِ حقیقی ۔ رحمٰن و رحیم ۔ قادر و کریم ۔ یومِ جزا کے مالک آپ ہمشہ انصاف کرتے ہیں ۔ آپ یومِ جزا کو تو انصاف کریں گے ہی ۔ میری آپ سے انتہائی انکساری سے استدعا ہے کہ جھُوٹوں اور ظالموں کو خواہ وہ حکومت میں ہیں یا نہیں ہیں اس سزا کا کچھ حصہ اس دنیا میں بھی دے دے تا کہ وہ بے قصور لوگوں پر ظلم کرنے سے ڈرنے لگیں ۔