فدوی افتخار اجمل بھوپال ہر اُس آدمی سے معذرت خواہ ہے جسے لايعنی يا مخرب الاخلاق برقی چِٹھی [E-mail] فدوی کے نام سے ملی ہے ۔ ہر چند کہ يہ چِٹھياں فدوی کی رضا و رغبت يا رضامندی کے بغير ہر اُس شخص کو گئی ہيں جس کا پتہ ميرے ياہو کے حساب [Yahoo account] ميں موجود ہے ۔ فدوی کا اگر قصور ہے تو اتنا کہ فدوی اپنا وقت بہتر طريقہ سے استعمال کرنے کيلئے ايک کمپيوٹر استعمال کرتا ہے مگر يہ ناہنجار چِٹھياں چونکہ ميرے نام سے جا کر مکتوب عليہان کی دلآزاری کا باعث بنی ہوں گی اسلئے معذرت لازم سمجھی گئی
شيطان کا کام تو شيطانی کرنا ہی ہے مگر ايسا ميرے نام سے کيوں ہوا ؟
کمپيوٹر اور انٹرنيٹ استعمال کرنے والے کچھ معصوم لوگ شيطان کی موجودگی سے بے خبر اپنے تجسس کی تسکين کی خاطر اِدھر اُدھر ہاتھ مارتے رہتے ہيں جس کے نتيجہ ميں شيطان اُن کے کمپيوٹر ميں آ بيٹھتا ہے اور شرارتيں شروع کر ديتا ہے ۔ مجھ سے غلطی يہ ہوئی کہ ايک مانوس بلکہ قريبی نام سے چِٹھی آئی ۔ بظاہر اُس ميں کچھ نہيں تھا اور جواب طلب تھی ۔ اسلئے ميں نے جواب لکھ بھيجا ۔ گويا اپنے پاؤں پر کُلہاڑا مار ليا ۔ اگلے روز لايعنی چِٹھياں ميرے نام سے چلی گئيں ۔ تحقيق کے بعد معلوم ہوا کہ ميرا ياہو کا حساب چوری [hack] ہو گيا ہے
ميں نے ياہو کے حساب کا شناختی لفظ [Password] بدل ديا ہے مگر چوروں نے سائنس ميں ہم سے زيادہ ترقی کر لی ہے اسلئے مستقبل کے ہر لمحے سے ڈر لگتا ہے
اتنی لمبی روئيداد يا تمہيد پيش کرنے کے بعد درخواست ہے اہلِ عِلمِ کمپيوٹر و انٹرنيٹ سے کہ مجھ” دو جماعت پاس ناتجربہ کار شہر ميں نووارد ديہاتی” کی رہنمائی فرمائيں ۔ اور کوئی مُجرّب مگر سہل طريقہ شيطانوں کی ايسی شرارتوں سے محفوظ رہنے کا بتا کر ميری دعاؤں کے حقدار بنيں ۔ بڑے شيطانوں سے تو ہم اللہ کی پناہ مانگ ليتے ہيں مگر چھوٹے شيطان کسی طرح چين سے نہيں رہنے ديتے
محترم اب پچھتائے کیا ہوت جب چڑیاں چگ گئیں کھیت
آئندہ کے لئے احتیاط بہت ضروری ہے ۔ غیر ضروری ای میل میں کھولتا ہی نہیں ۔ لیکن پھر بھی شکریہ کہ ان چھوٹے شیطانوں سے خبردار کیا ۔ سمجھ نہیں آتا انہیں ملتا کیا ہے ۔ ایسی بے تکی حرکتیں کرنے سے کیا مزہ آتا ہے ۔
Pingback: ہوشيار ۔ خبردار ۔ اور مدد درکار ہے | Tea Break
یاہو کے اکاؤنٹ میں اکثر اس طرح کے مسئلے ہوتے رہتے ہیں۔۔۔
اگر آپ جی میل پر اکاؤنٹ بنا کر مائیکروسافٹ آؤٹ لک ایکسپریس پر سیٹ کرلیں
تو اس سے بہت سے مسائل حل ہوجاتے ہیں۔
محمود الحق صاحب
اگر آپ جيسا شيف آدمی مجھے ای ميل بھيجے اور بظاہر اُس ميں خرابی بھی نہ ہو تو ميں کيسے نہ کھولوں
خالد حميد صاحب
مائیکروسافٹ آؤٹ لک ایکسپریس ہی استعمال کيا کرتا تھا ۔ پھر جب ہارڈ ڈرائيو کا سائز بڑا اور معيار گھٹيا ہوا اس کے ساتھ وائرس کا معيار بہت بلند ہو گيا ۔ تو مائیکروسافٹ آؤٹ لک ایکسپریس کی پوری ايڈريس بُک غائب ہونا شروع ہو گئی ۔ پھر ايم ايس اين کا سہارا ليا تو وہ عام ہيک ہونے لگا ۔ اس کے بعد جی ميل اور ياہو سے کام لينا شروع کر ديا اور بہت اچھا چلتے رہے ۔ صرف حال ہی ميں دو بار اکاؤنٹ ہيک ہوا ہے ۔ پہلی بار ميں نے ون 32 ميں ٹروجن ہارس پائے جانے کی وجہ سے سی ڈرائيو فارميٹ کر دی تھی اور اب دو اينٹی وائرس سافڑ ويئرز سے سکين کرنے اور وائرس مٹانے کے بعد پاسورڈ تبديل کر ديا ہے
جناب اب کیا ہوت
ہم تو چٹھی وصول چکے،
میں بھی سوچوں آپکی جانب سے یہ شریف چٹھی مجھ تک کیسے پہنچی؟
ياسر صاحب
اگر آپ نے چِٹھی ميں ديئے لِنک پر کلِک نہيں کيا تو پريشانی کی ضرورت نہيں ہے ۔ اگر لنک پر کلِک کيا تھا ۔ تو اينٹی وائرس چلايئے جو ايڈ ويئر اور سپائی ويئر وغيرہ کو بھی پکڑتا ہو ۔ آپ کو تو سب کچھ ميسّر ہو گا ۔ مشکل تو ہماری ہے کہ اپنے ہاں کوئی جينوئن سافٹ ويئر نہيں ملتی ۔ اس لئے مُفت والی جينوئن ڈاؤن لوڈ کرتے ہيں
شعيب صاحب
شکر ہے آپ نے نعرہ نہيں لگا ديا “بُڈھا ٹھرکی”۔
گو کہ مجھے ان چیزوں کے بارے میں اتنا علم نہیں لیکن میرا خیال ہے کہ آپ کا اکاونٹ ہیک نہیں ہوا تھا بلکہ آپکے ای میل میں کوئی وائرس آگیا تھا ، آجکل ای میل میں یہ وائرس بہت چل رہا ہے جو اسکو کھولتا ہے اسکے ای میل سے بھی پھر وہی ای میل جانا شروع ہو جاتی ہے ۔ بلکہ اب تو اس چیز کو سال ہو گئے
انکل ٹام صاحب
آپ نے درست کہا ہے ۔ ميرا خيال بھی کچھ ايسا ہی تھا ۔ مگر ايک جوان جو ايک معروف سافٹ ويئر ڈويلوپمنٹ کمپنی ميں کام کرتا ہے ميں نے اس سے بہتر اينٹی وائرس کا پوچھا تو اُس نے کہا تھا کہ ہيک ہو گيا ہے